सन्मार्गाची दृष्टी

दीपा आणि प्रकाशा । एकवंकीचा पाडू जैसा ।।
तो माझा ठायीं तैसा । मी तयामाजीं ।।
दिवा आहे तेथे प्रकाश आहे. यांचे जसे ऐक्‍य आहे. तसे संत जिथे असतात तेथे चैतन्य वास करीत असते. दिवा जसा अंधार दूर करतो. तसे संत भक्तांच्या आयुष्यातील अंधार दूर करतात. भक्तांच्या ह्रद्‌यात भक्तीचा मळा फुलवितात. अंधकारमय जीवन चैतन्याने भरून टाकतात. यासाठी संतसंग करावा. त्यांच्या सहवासाने आयुष्यात सन्मार्गाची वाट दृष्टीस पडते. दिवा जसा स्वतः जळतो व दुसऱ्याला प्रकाश देतो तसे संत भक्ताचे सर्व अपराध स्वतः घेऊन त्याला सन्मार्ग दाखवितात व भक्ताचे जीवन प्रकाशमान करून टाकतात. त्याला दृष्टी देतात. स्वतःच्या पातळीवर आणून बसवतात.