कोणताही व्यवसाय करताना त्यात अडचणी, समस्या असतातच. यातून व्यवसायाचे नुकसानही होते. हाच अनुभव लेखकालाही आला. चुकीच्या पद्धतीचा अवलंब केल्याने शेळीपालन करत असताना मोठे नुकसान सोसावे लागले. यातून सावध होत लेखकाने पशुवैद्यकीय अधिकाऱ्यांची मदत घेत शेळीपालन व्यवसाय सावरला. त्यांना आलेल्या अडीअडचणी नवा व्यवसाय सुरू करणाऱ्या शेतकऱ्यांना येऊ शकतात हे विचारात घेऊन लेखकाने हे पुस्तक लिहिले आहे.
शेळीपालन म्हणजे नेमके काय? येथपासून ते त्याचे व्यवस्थापन, प्रथमोपचार, लसीकरण, शेळ्यांची घ्यायची निगा, चारा नियोजन अशा तांत्रिक माहितीसह विक्री व्यवस्थापन, उपलब्ध संधी या सर्व गोष्टींची माहिती पुस्तकातील ३२ प्रकरणात दिलेली आहे. कुर्बानीसाठी लागणारे बोकड कसे तयार करायचे यावर स्वतंत्र प्रकरण आहे. कुर्बानीचा बोकड कसा असावा, त्याची निगा कशी राखायची, कुर्बानीच्या बोकडाची विक्री व्यवस्था याची मुद्देसूद मांडणी लेखकाने केली आहे. महाराष्ट्रात शेळी व मेंढी खरेदी विक्री होणारी ठिकाणे आणि त्या गावांचा आठवडे बाजार याचीही माहिती दिली आहे. व्यवसाय करताना नोंदी कशा ठेवाव्यात यावर स्वतंत्र प्रकरण या पुस्तकात आहे. शेडमधील नोंदीसाठी स्वतंत्र वही कशी ठेवायची, यात कोणत्या नोंदी घ्यायच्या, त्या कशा टिपायच्या याची माहिती पुस्तकातून मिळते.
शेळीपालनाच्या व्यवसायात संधी कशा आहेत हे उदाहरणे देऊन त्यांनी स्पष्ट केले आहे. गावात व्यवसाय सुरू करताना कोणत्या गोष्टी विचारात घ्यायला हव्यात, कसा विचार करावा, कसे नियोजन करावे हे सांगताना त्यांनी उत्तम उदाहणे दिली आहेत. यशस्वी शेळीपालनासाठी कोणते घटक आवश्‍यक आहेत या सर्व विषयांची मुद्देसूद मांडणी पुस्तकात आहे.
शेळीपालनासंबंधी असणारे गैरसमज दूर करण्याचाही प्रयत्न या पुस्तकाच्या माध्यमातून लेखकाने केला आहे. शेळीपालन करताना तांत्रिक माहितीबरोबरच कोणत्या गोष्टींची विशेष काळजी घ्यायला हवी हे सांगितले आहे. शेळीपालन व्यवसायात कोणत्या गोष्टींमुळे अपयश येते, त्याची प्रमुख कारणे आणि त्यावर कसे उपाय योजावेत याची स्पष्ट मांडणी स्वतंत्र प्रकरणातून केली आहे.
शेळीपालन व्यवसायातील जोखीम आणि विमा कवच याचीही माहिती मिळते. शेळी विक्री तसेच वाहतुकीदरम्यान कोणती काळजी घ्यावी याची माहिती पुस्तकातून मिळते. मुद्देसूद मांडणी आणि सोपी भाषा असल्याने पुस्तक वाचण्यास सोपे जाते. समस्या लक्षात येण्यास आणि त्या सोडविण्यासाठी दिलेले उपाय याची माहिती वाचकांना निश्‍चितच उपयुक्त ठरणारी आहे.
पुस्तकाचे नाव - आत्मविश्‍वासाने करा आधुनिक शेळीपालन
लेखक - अमित शिवाजी जाधव, मोबाईल - 9619864649,9833685299
प्रकाशक - ज्ञानदीप ॲकॅडमी, पुणे
पृष्ठे - २२४
किंमत - १९० रुपये
No comments:
Post a Comment