आता मुलांनी होम सायन्समध्ये जावे - यशवंत थोरात ( व्हिडिओ)

कोल्हापूर - आमच्यावेळी मुली होमसायन्सला जात असत. काही करता आले नाही तरी लग्नानंतर जेवण तरी उत्तम बनवता यावे असा त्यामागचा उद्देश होता. आता मात्र सर्वत्र मुलींनाच यश मिळत आहे. सर्वत्र मुलीच पुढे दिसत आहेत. ग्रामीण भागातील मुली मुलांच्या पुढे आहेत. इंजिनिअरिंग, मॅथेमेटिस्कमध्ये मुलीच चांगले यश मिळवत आहेत. मुले आज मागे पडत आहेत. यासाठी मी मुलांना आता सांगु इच्छितो की आता त्यांनी होम सायन्समध्ये जावे, असे मत डाॅ यशवंत थोरात यांनी व्यक्त केले.

डाॅ. अपर्णा पाटील यांच्या लहान स्वप्न आणि उंच भरारी पुस्तकाचे प्रकाशन प्रसंगी श्री. थोरात बोलत होते. श्री. थोरात म्हणाले, येणाऱ्या दहा पंधरा वर्षात देशात सामाजिक क्रांती होईल. ही क्रांती जातीच्या भेदभावावर होणार नाही. ही क्रांती आर्थिक नसेल. ही क्रांती होणार आहे शहर आणि खेड्यातील वाढत्या दरीवर. माझा  विश्वास आहे की ग्रामीण भागात आज शिक्षण चांगले नाही. निकष कोणते लावतात यावर ते अवलंबून आहे. पण शहरातील शाळांच्या तुलनेत ग्रामीण भागातील शिक्षण चांगले नाही. खेड्यातील मुलांना शहरातील मुलांच्या प्रमाणे अपेक्षा ठेवत आहेत. त्यांच्या महत्त्वकांक्षा तेवढ्याच आहेत. आणि जर याला आम्ही ग्रामीण मुलांना हे देऊ शकलो नाही तर एक मोठी समस्या निर्माण होणार आहे.